Pasditen e sotme kryetari i Partisë Socialiste Edi Rama do të mbledhë Asamblenë. Rend dite publik nuk ka. Por qeveria prej ditësh ka filluar që të “dridhet” nga ajo që mund të ndodhë. Kryeministri ka treguar se është njeri i surprizave dhe një gjë e tillë mund të ndodhë edhe sot. Ka kaluar gjysma e mandatit të tretë dhe jo çdo gjë shkon sikur duhet të ishte.
Skandale, arrestime dhe shumë dosje të hapura. Pa harruar pakënaqësinë. Sidomos brenda llojit. Tre janë ndryshimet që mund të bëjë Edi Rama. Së pari mund të bëjë ndryshime në pozicionet e drejtuesve të qarqeve dhe riorganizimit të partisë. Së dyti mund të vendosë kryetarin e ri të grupit.
Pas largimit të Taulant Ballës vendi është bosh. Dhe së treti, nuk përjashtohet që mund të ketë lëvizje në kabinet. Ashtu sikur emri i ri i kryetarit të grupit mund të dalë nga qeveria. Dy ditë më pas kryeministri do të mbledhë qeverinë në Tepelenë, pranë ujit të ftohtë për të bërë bilancet para pushimeve të gushtit.
