Kryeministri i Maqedonisë së Veriut, Dimitar Kovaçevski ka takuar sot në Athinë presidentin e Ukrainës, Volodymyr Zelensky pas darkës së mbrëmshme me liderët e Ballkanit të organizuar nga kryeministri grek, Mitsotakis.
Bëhet me dije se në takimin me Kovaçevskit dhe Zelensky-t, fokusi i bisedimeve ka qenë rreth luftës në Ukrainë.
Kovaçevski theksoi mbështetjen e vazhdueshme që Maqedonia e Veriut jep për Ukrainën në përpjekjet për mbrojtjen e vendit dhe rivendosjen e lirisë dhe paqes, e me këtë edhe të stabilitetit në rajon.
Ai shtoi se Maqedonia e Veriut do të vazhdojë të ndihmojë Ukrainën për aq kohë sa të jetë e nevojshme, duke dërguar ndihma, siç ka bërë deri më tani.
“Duke dënuar agresionin brutal ushtarak të kryer nga Rusia kundër Ukrainës së pavarur dhe sovrane, Kovaçevski përsëriti se Maqedonia e Veriut do të vazhdojë me mbështetjen e qartë dhe të fortë për Ukrainën, në vetëmbrojtjen e saj dhe mbrojtjen e pavarësisë, sovranitetit dhe integritetit territorial.
Maqedonia e Veriut e manifeston qartë këtë qasje si në baza dypalëshe ashtu edhe brenda NATO-s, si dhe duke iu bashkuar Deklaratës së vendeve të G7 për garancitë e sigurisë për Ukrainën,” thuhet në njoftimin e shpërndarë nga zyra e shtypit të qeverisës së Maqedonisë së Veriut.
