Nxënësit rusë kanë nisur vitin e ri shkollor me fjalë inkurajuese nga presidenti, Vladimir Putin, dhe me një libër të ri të historisë, që sipas kritikëve synon të “nxisë zemërim ndaj ukrainasve” dhe ua shpjegon rekrutëve të ardhshëm “pse duhet të veshin uniformën ushtarake”.
Duke folur përmes video-lidhjes, Putin përmendi një listë arritjesh nga Qeveria, duke u thënë nxënësve se shteti po jep një shembull “në krijimin e kushteve për arsimimin e gjeneratës së re”.
Por, ai nuk përmendi librin e ri të historisë për shkollat e mesme, që veç tjerash, justifikon pushtimin në shkallë të gjerë të Ukrainës.
Libri i rishkruar i historisë do të përdoret nga nxënësit e klasës së njëmbëdhjetë, apo vitit të fundit të shkollës së mesme. Ky tekst shkollor është “i mbushur me klishe të propagandës zyrtare ruse” dhe tenton të justifikojë veprimet e paligjshme të Rusisë, përfshirë aneksimin e paligjshëm të Krimesë më 2014 dhe pushtimin në shkallë të plotë të Ukrainës më 2022, tha përmes një deklarate më 1 shtator organizata për të drejtat e njeriut, Amnesty International.
“Ky libër fsheh të vërtetën dhe keqinterpreton faktet lidhur me një sërë shkeljesh të të drejtave të njeriut dhe krimeve që cilësohen në bazë të ligjit ndërkombëtar, të cilat janë kryer nga forcat ruse kundër ukrainasve,” tha Anna Wring, hulumtuese në Amnesty International për Evropën Lindore dhe Azinë Qendrore.
“Indoktrinimi i fëmijëve në një fazë të ndjeshme të zhvillimit të tyre është një përpjekje cinike për të çrrënjosur kulturën ukrainase, trashëgiminë dhe identitetin ukrainas dhe gjithashtu është një shkelje e të drejtës për arsimim,” shtoi Wright. /REL
Artikulli i plotë këtu.
