Gjermania do të zbatojë kontrolle më të forta kufitare me Poloninë dhe Republikën Çeke, për të ndihmuar në luftën kundër trafikimit të qenieve njerëzore, tha ministrja e brendshme gjermane të martën, ndërsa rritja e migracionit shton mbështetjen për të djathtën ekstreme përpara zgjedhjeve lokale.
Gjermania ka pranuar rreth 1 milion refugjatë ukrainas gjatë vitit të kaluar, ndërsa janë rritur ndjeshëm kërkesat për azil që nuk lidhen me Ukrainën. Autoritetet lokale thonë se po ndërtojnë banesa të reja, por kanë vështirësi për të përmbushur kërkesat.
Shqetësimet për migrimin kanë ndikuar që partia e ekstremit të djathtë, Alternativa për Gjermaninë të renditet e dyta në sondazhet mbarëkombëtare dhe e para në lindje të vendit, në prag të zgjedhjeve të 8 tetorit në shtetet Hesse dhe Bavaria.
Në një intervistë për radion publike “Deutschlandfunk”, Ministrja e Brendshme Nancy Faeser, anëtare e socialdemokratëve të qendrës së majtë të Kancelarit Olaf Scholz, tha se Gjermania do të vendosë kontrolle kufitare me Poloninë dhe Republikën Çeke.
“Ne do të përgatisim kontrolle më të forta kufitare për të luftuar më mirë trafikantët e qenieve njerëzore,” tha Faeser, e cila kandidon në zgjedhjet e 8 tetorit për postin e kryeministres së shtetit Hesse.
Ajo nuk tha se kur do të zbatoheshin masat e reja. Gazeta Politico raportoi se kontrollet e reja do të shpalleshin zyrtarisht të mërkurën. Ministria e Brendshme nuk iu përgjigj një kërkese për koment.
Kancelari Scholz, partia e të cilit është prapa në sondazhet në shtetin Hesse, la të kuptohet javën e kaluar se Gjermania mund të ndërmarrë hapa për të forcuar kufirin me Poloninë, pasi i bëri thirrje qeverisë polake të sqarojë akuzat për një marrëveshje për viza me pagesë për emigrantët./VOA
Artikulli i plotë këtu.
