Kryetari i LDK-së, Lumir Abdixhiku ka reaguar në lidhje me arrestimin e organizatorit të sulmit në veri, Milan Radojçiç ku në një përgjigje për Klankosova.tv u shpreh se ai duhet t’i dorëzohet organeve drejtësisë së Kosovës.
“Një përpjekje e kot dhe gjithsesi e vonshme e Serbisë dhe Presidentit Vuçiç për t’u distancuar nga organizimi dhe strehimi i terroristeve të Banjskës.
Tani që stërvitja, armatosja, mbështetja logjistike e vet strehimit të terroristëve kanë dalë në shesh botërisht përpjekjet e tilla janë lëvizje dëshpëruese për distancim.
Terroristi Radojiçiç duhet t’iu dorëzohet organeve kosovare të drejtësisë, si pjesë e pashmangshme e bërjes se drejtësisë për vrasjen e heroit Afrim Bunjaku. Një vend kandidat për në BE nuk duhet të tolerohet me një politikë të tillë,” u shpreh kreu i LDK-së.
“Komuniteti ndërkombëtar duhet të mbajë përgjegjës institucionet udhëheqëse të Serbisë, politike dhe ato të sigurisë, për një tendencë të tillë.
Për Kosovën, në të njëjtën kohë, është e domosdoshme fitorja e betejës diplomatike sot dhe rikthimi i pozicionit tonë të drejtë në raport me Serbinë,” shtoi Abdixhiku.
