Gjykata e Durrësit ka lënë në burg Aldi Mustafën, i cili u arrestua tre ditë më parë pasi po lëvizte me armë pa leje në makinë. Aldi Mustafa ishte bashkë me një person tjetër në makinë. Arrestimi i tij është kryer në zonën e ish-kënetës në Durrës.
Aldi Mustafa nuk është një emër i panjohur për policinë, pasi rezulton me precedentë të theksuar kriminal. Në 3 prill të këtij viti, persona ende të paidentifikuar shpërthyen me telekomandë makinën e Aldi Mustafës.
37-vjeçari doli i pa lënduar nga shpërthimi ndërsa pak minuta para se të ndodhte ngjarja, la në banesë gruan me fëmijën. Ai është i njohur si pjesë e grupit të ‘Rrumit të Shijakut’, Aleksandër Laho.
Grupi hetimor akoma e ka të paqartë se kush ishte objektivi i tij, pasi ngjarja e ndodhur 6 muaj më parë ka mbetur e pazbardhur akoma. Para hetuesve, Aldi Mustafa ka kyçur gojën dhe nuk ka deklaruar asnjë gjë, duke mbajtur mister për momentin kë donte të vriste.
