Kombëtarja shqiptare e futbollit ka mposhtur mbrëmjen e sotme përfaqësuesen çeke me rezultatin 3-0 në “Air Albani”, në ndeshjen kualifikuese e vlefshme për Euro 2024.
Me këtë ndeshje dhe këto 3 gola Shqipëria ka rrëmbyer edhe 3 pikë në renditjen në grupi E duke vijuar kryesimin me plot 13 pikë.
Fillimisht ishte “perla” e Jasir Asanit, “perlë” e cila tundi rrjetën e portierit Pavlenka, në minutën e 9′ të sfidës, duke filluar festën e 22 mijë tifozëve të pranishëm, në mitikun “Air Albania”. Goli u pasua dhe nga raste të tjera të “kuqezinjve”, por më kot, goli i dytë nuk arriti të sigurohej.
Në krahun tjetër, çekët filluan menjëherë ofensivat sulmuese dhe në minutën e 40′ gjejnë golin e barazimit, por me ndihmën e arbitrave anësor, kryesori holandez, Danny Makkelie, fillimisht anullon golin pas shtyrjes së topit me dorë në rrjetën e Berishës e më pas nxjerr kartonin e kuq për “bomberin” Mojmir Chytil, me këtë të fundit që lë skuadrën e tij me 10 lojtarë në fushën e blertë, pas ndëshkimit me 2 kartonë të verdhë në fushën e blertë.
Me fillimin e pjesës së dytë, djemtë e teknikut Sylvinho arritën të gjejnë dhe 2 herë të tjera rrugën e rrjetës, me anësorin e sulmit, Taulant Seferi, i cili mposhi portierin Pavlenka, në minutat 51’ e 73’, duke “vulosur” rezultatin e përgjithshëm.
Rrugën e rrjetës e gjeti dhe Muja në minutën e 82’-të të sfidës, mirëpo pas rishikimit të golit me “Sistemin VAR” goli rezultoi i parregullt.
