Një përplasje mes dy grupeve u kthye në vdekjeprurëse në Florida kur të shtënat në rrugë gjatë festimeve të Halloween rezultuan me dy të vdekur dhe 18 të plagosur. Pas ngjarjes, një i dyshuar është në paraburgim dhe një tjetër është në kërkim.
Dyshohet se dy sulmues hapën zjarr pak para orës 3 të mëngjesit në bllokun 1600 të East 7th Avenue në zonën e qytetit Ybor, tha shefi i policisë së Tampa, Lee Bercaw gjatë një konference për shtyp në vendngjarje.
Përleshja ndodhi në një zonë me disa bare dhe klube dhe në atë kohë kishte një numër të madh argëtuesish natën vonë në zonë, tha Bercaw.
Zëdhënësja e policisë në Tampa, Jonee Lewis tha se “qindra” njerëz ishin në rrugë pasi shumë vende të natës u mbyllën herët të dielën. Ajo tha se një person u arrestua, por asnjë akuzë nuk u ngrit menjëherë.
“Ata po merren në pyetje dhe ne do të nisim nga aty,” tha Lewis.
Policia nuk ka dhënë emrat e të vrarëve, por Emmitt Wilson tha se djali i tij 14-vjeçar, Elijah, ishte një nga viktimat.
Wilson doli në vendngjarje të dielën pasi mori një telefonatë se djali i tij ishte viktimë.
“Është çmenduri për mua. As që ndihem sikur jam këtu tani,” tha Wilson.
“Shpresoj që hetuesit të bëjnë punën e tyre dhe të zbulojnë se kush e vrau djalin tim,” shtoi Wilson.
