Ditën e enjte në Bruksel pritet të takohen kryenegociatorët e Kosovës dhe Serbisë për të diskutuar për përgjegjësitë që dalin nga plani franko-gjerman për të dyja vendet.
Takimi vjen pasi udhëheqësit francez, gjerman dhe italian qartësuan pritshmëritë e tyre ndaj Kosovës dhe Serbisë për procesin e normalitizimit të marrëdhënieve.
Kritika të marra dhe nga Komisioni Evropian, drejtuar palëve për mungesën e përkushtimit ndaj këtij procesi.
Por, njohësit e zhvillimeve mes dyja vendeve thonë se qëndrimi i Serbisë ndaj Kosovës vetëm është ashpërsuar dhe se nëse nuk ka një strategji afatgjatë për zgjidhje të qëndrueshme mes dy vendeve, trysnia e perëndimit nuk do të sjellë ndonjë ndryshim.
Jolyon Naegele, ish zyrtar i OKB-së në Kosovë dhe koordinatori i parë i dialogut ndërmjet Kosovës dhe Serbisë gjatë mandatit të UNMIK-ut në vitin 2003, në një intervistë për Zërin e Amerikës kritikon bashkësinë ndërkombëtare që në 20 vitet e fundit nuk ka ofruar zgjidhje afatgjata.
Eksperti i marrëdhënieve ndërkombëtare pranë Universitetit Westminster, Aidan Hehir gjithashtu konsideron se rajoni është i paqartë se cilat janë synimet e BE-së në Ballkanin Perëndimor.
Sipas tij, në kushtet e ndryshmit të situatës gjeostrategjike, Bashkimi Evropian dhe Shtetet e Bashkuara i kanë përqendruar përpjekjet tek afrimi i Serbisë me Perëndimin.
“Kjo nënkupton t’i kërkohet Kosovës të bëjë një mori lëshimesh Serbisë… I tërë procesi i negociatave është shndërruar në përpjekje për t’i dhënë Vuçiçit diçka që ai të afrohet me Perëndimin dhe të largohet nga Rusia,” thotë ai.
