I pyetur për propozimin e VMRO-DPMNE-së ndaj LSDM-së, që të ndryshohet ligji për qeverinë vetëm që mos të propozohet kryeministri shqiptar nga BDI- në 100 ditët e fundit të kësaj Qeverie, zv/ kryeministri Artan Grubi tha se kjo është tragjedi dhe paralajmëron se çfarë do të ndodhë nëse VMRO-DPMNE-ja fiton zgjedhjet. “Kjo është tragjedi, kjo është paralajmërim i gjithë asaj që vijon, nëse, kushtimisht thënë, VMRO-DPMNE do t’i fitonte zgjedhjet, dhe me të vërtet më vjen keq”, tha mes tjerash Grubi në “24TV”.
Grubi tha se marrëveshjet duhet të respektohen. Grubi pohoi se qëllimi është që të vërtetohet se vendi është për një shoqëri me të drejta të barabarta. “Qëllimi është që të thyejmë tabu të paragjykimeve dhe të trajtimit të qytetarëve si të rendit të dytë në shtet dhe me udhëheqjen simbolike të Qeverisë në 100 ditët e fundit të tregojmë se jemi për shoqëri të barabartë për të gjithë dhe jo vetëm një shoqëri për të gjithë. Që të jetë një, duhet të jetë e barabartë ajo Qeveri për të gjithë, ku edhe shqiptarët, romët, turqit, vllahët dhe boshnjakët dhe serbët, bashkë me maqedonasit, do të jenë të barabartë, asgjë e keqe nuk do t’i ndodhë Maqedonisë”, deklaroi Grubi.
“Në këto rrethana, nuk e shoh se do të ishte nga radhët e ministrave”, tha zv/ kryeministri Artan Grubi i pyetur për kandidatin për kryeministër shqiptar. Grubi tha se do të ishte mirë që të ishte kryeministre, respektivisht të ishte grua. “Do të ishte mirë të ishte zonjë, këtë e paralajmërova edhe në deklaratën time kur veçmë njoftova se nuk do të jem unë dhe se nuk dua të jem unë. Do të shohim. Ndoshta do të befasohet publiku për të mirë”, the Grubi.
