Alexander Lukashenko është presidenti i Bjellorusisë për gati 30 vite, një sundim me dorë të egër të cilin duket se do ta forcojë gjithnjë e më shumë.
Kjo pasi ai ka nënshkruar dhe një ligj të ri duke i dhënë vetes imunitet të përjetshëm nga ndjekja penale dhe parandalon liderët e opozitës që jetojnë jashtë vendit të konkurrojnë në zgjedhjet e ardhshme presidenciale.
Teorikisht, ligji pritet të zbatohet për çdo ish-president dhe anëtarët e familjes së tij, por siç thamë dhe më lart Lukashenko prej 30 vitesh mbanë pushtetin në duart e tij.
69-vjeçari duket se synon të forcojë dhe më tepër pushtetin e tij dhe të eliminojë sfiduesit e mundshëm në zgjedhjet e ardhshme presidenciale të vendit, të cilat do të zhvillohen në vitin 2025.
Ligji po ashtu shtrëngon ndjeshëm kërkesat për kandidatët presidencialë dhe e bën të pamundur zgjedhjen e liderëve të opozitës që ikën në vendet fqinje vitet e fundit.
Vetëm qytetarët e Bjellorusisë që kanë banuar përgjithmonë në vend për të paktën 20 vjet dhe nuk kanë pasur kurrë leje qëndrimi në një vend tjetër do të kenë të drejtë të konkurrojnë.
