Një person i moshës rreth 54-vjeçare është gjetur pa shenja jete në një klinikë dentare në Prizren. Rasti ka ndodhur këtë të mërkurë. Lajmin e ka konfirmuar zëdhënësi i Policisë së Kosovës për rajonin e Prizrenit, Shaqir Bytyqi.
“Sot me datë 17.01.2025, rreth orës 10.37 është pranuar informata se në ordinancën dentare ‘Kiseri Dent’, e cila gjendet në sheshin Shatërvan, në Prizren, është gjet një person për të cilin dyshohet se ka kryer vetëvrasje me varje”.
“Nga mjekët e emergjencës është konstatuar vdekja e viktimës”, ka thënë Bytyqi. Ai ka bërë të ditur se patrulla policore ka bërë sigurimin e vendit të ngjarjes.
“Në vendngjarje kanë dalë hetuesit dhe hetuesit e vendit të ngjarjes (forenzika) nga Sektori Rajonal i Hetimeve. Viktima është A.K. viti i lindjes 1970, mashkull”.
Bytyqi ka theksuar se pas përfundimit të këqyrjes së vendit të ngjarjes, me urdhër të prokurorit trupi i pajetë i viktimës dërgohet në Institutin e Mjekësisë Ligjore në Prishtinë.
