Kryeministri Edi Rama bën kthesë. Pak ditë më parë deklaronte se sektori fason është në “vdekje klinike” dhe se nuk kishte ndërmend që ta ndihmonte, por gjatë takimit me përfaqësuesit e këtij biznesi njoftoi se ka marrë katër masa ndihme.
Së pari do të ketë rimbursim të shpejtë të TVSH-së, së dyti overdraft për disponimin e shpejtë të likuiditetit, garanci sovrane për investime dhe skemë financimi për ngritjen e një akademie profesionale.
Në fund edhe një premtim, se qeveria do të rrisë angazhimin e saj për ta mbështetur më tej këtë sektor që të mbyllë vetë ciklet e prodhimit, si dhe të bëhet më produktiv e më konkurrues duke fuqizuar markën “Made in Albania”.
“Piramida e Tiranës – Në “Shtëpinë e Biznesit” me përfaqësuesit e shoqatës së industrisë me material porositësi (fason), për të diskutuar mbi nevojat për transfomimin e mëtejshëm të sektorit, në shembullin e kompanive lider në sektor; masat mbështetëse që do të ndërmarrim për kapërcimin e sfidave të zhvillimit; domosdoshmërinë e të kuptuarit nga të gjithë aktorët e sektorit të faktit se koha e krahut të lirë të punës si avantazh konkurrues ka përfunduar prej disa kohësh tanimë dhe ky fakt përballet vetëm me investime në teknologji e inovacion, e me paga dinjitoze rrjedhimisht” tha ai. Sektori fason paralajmëroi mbyllje masive të vendeve të punës për shkak të rënies së euros.
