Presidenti i SHBA Joe Biden tha të hënën se shpreson të shohë një armëpushim të ri në Gaza deri në fillim të javës së ardhshme, ndërsa delegacione nga disa vende punojnë për të negociuar ndalimin e parë të luftimeve që nga fundi i nëntorit.
“Këshilltari im për sigurinë kombëtare më thotë se jemi afër,” u tha Biden gazetarëve në Nju Jork. “Ne jemi afër. Nuk kemi mbaruar ende. Shpresoj se të hënën e ardhshme do të kemi një armëpushim.”
Negociatorët kanë punuar drejt një marrëveshjeje që do të ndalonte luftimet për gjashtë javë. Marrëveshja do të përfshijë lirimin e pengjeve të mbajtura nga militantët e Hamasit në Gaza, si dhe lirimin e të burgosurve palestinezë të mbajtur nga Izraeli.
Qindra kamionë që transportonin ndihma humanitare në Gaza çdo ditë do të ishin gjithashtu pjesë e marrëveshjes.
Kryeministri izraelit Benjamin Netanyahu ka thënë se një armëpushim i përkohshëm nuk do të ndryshonte planet e Izraelit për të kryer përfundimisht një ofensivë në qytetin jugor të Rafahut për të arritur qëllimin e Izraelit për të eliminuar Hamasin.
Perspektivat e një operacioni në Rafah kanë ngritur alarmin ndërkombëtar për shkak të numrit të madh të palestinezëve që jetojnë atje, shumë prej tyre pasi u larguan nga pjesë të tjera të Gazës në kërkim të sigurisë.
Zyra e Netanyahut tha të hënën se ushtria izraelite i dha kabinetit të tij të luftës “një plan për evakuimin e popullsisë nga zonat e luftimeve në Rripin e Gazës dhe me planin e ardhshëm operacional”.
Shtetet e Bashkuara, aleati kryesor i Izraelit në luftën e tij gati pesë-mujore kundër Hamasit, e kanë paralajmëruar Izraelin kundër një ofensive tokësore në Rafah, në veri të kufirit të Gazës me Egjiptin, pa evakuuar më parë palestinezët që strehohen atje.Për më shumë kliko KËTU
