Eksperti i sigurisë, Fajton Softa i ftuar në një bisedë në “Skype” në “5Pyetjet.al” deklaroi se nuk përjashtohet mundësia që Ervis Martinaj të jetë gjallë dhe të jetojë i strehuar në ndonjë bazë të nëndheshme.
Softa tha se për sa kohë nuk ka asnjë fakt është e mundur çdo gjë. Ai solli ndër mend rastin e bosit italian të mafias Matteo Messina Denaro, që kërkohej kudo por ishte mes të gjithëve.
“Nganjëherë i kërkojmë larg dhe mund t’i kemi afër, sepse vendi më i sigurtë është vendi jot ku ke ndërtuar kështjellën tënde. Shpesh ka ndodhur që personat më të kërkuar kanë jetuar afër banesave të tyre, duke ndërtuar edhe strehime të nëndheshme. Edhe persona të tjerë për të cilët është thënë se janë vrarë, janë copëtuar.
Ervis Martinaj mund të jetë jashtë, mund të jetë brenda, mund të jetë i vrarë, të gjitha gjasat janë për aq kohë sa nuk ka asnjë të dhënë për fatin e tij.
Nëse do të jetë gjallë, mundësitë e tij financiare janë të tilla, që mund të bëjë edhe ndërhyrje estetike. Njerëzit nga këto ndërhyrje kanë ndryshuar edhe gjininë, jo më pamjen.
Shqipëria ka pasur jo pak raste kur tunelet e nëndheshme janë përdorur, rasti i një arratisjeje nga një burg i sigurisë së lartë, ku morën një ambient me qira afër dhe gërmonin duke shkuar afër burgut. E njëjta gjë ka ndodhur me persona që kishin krijuar një bazë të nëndheshme”, tha ai në “5Pyetjet.al”.
