Zëdhënësja e grupit të Lulzim Bashës Mirela Karabina në një deklaratë për mediat ka denoncuar se Autoriteti rrugor Shqiptar u ka dhënë 13 tendera me vlerë 200 mln euro klientëve të qeverisë.
Karabina tha se u vendosën në kriteret e tenderimit kushte dhe afate që asnjë kompani e huaj nuk kishte mundësi ti plotësonte.
“Në muajin qershor ARRSH ka shpallur fituesit e 200 milionë euro tendera, vlerat e të cilave si në çdo tenderim janë të tejfryra, gjë që faktohet edhe nga ofertat shumë herë më të ulëta të operatorëve ekonomikë në garë, të cilët nëse do të kualifikoheshin ata fitues dhe jo klientët e përhershëm të qeverisë, buxhetit të shtetit do t’i kursehej 20 milionë euro ose 10% e vlerës totale të tenderuar”, tha Karabina.
Gjithashtu ajo shtoi se do ta denoncojë në SPAK këtë kallëzim penal pasi kjo bandë drejtohet nga Belinda Balluku si ministre e linjës.
