Kryeministri sllovak Robert Fico ka dalë për herë të parë publikisht që nga atentati që i rrezikoi jetën kur u qëllua 5 herë më 15 maj.
Ai bëri vetëm një referencë për atentatin ndaj tij, duke iu referuar vetëm si një “ngjarje fatkeqe” dhe e përdori fjalimin e tij kryesisht për të folur për nevojën për të ndërtuar një barrierë kundër progresivizmit që ai tha se po përhapet “si një kancer”.
“Ato janë ideologji që po e dëmtojnë këtë vend. Janë ideologji që u krijuan ndoshta vetëm pardje. Unë nuk dua që Sllovakia të jetë një nga vendet që bëjnë një karikaturë të qytetërimit perëndimor. Ne jemi një komb krenar,” tha ai.
Gjithashtu Fiço foli dhe për luftën në Ukrainë duke thënë se situata mund të dalë jashtë kontrollit.
“Nëse nuk bëjmë diçka në ditët dhe muajt e ardhshëm, situata që po zhvillohet në Ukrainë mund të dalë jashtë kontrollit dhe ne mund të shohim një luftë të pakontrolluar”, paralajmëroi Fico.
