Shirat e dendur shkaktuan rrëshqitje dheu dhe përmbytje në Nepal, duke vrarë të paktën 11 persona në 36 orët e fundit dhe duke bllokuar sektorët kryesorë të rrugëve, thanë autoritetet sot.
Tetë persona të tjerë rezultojnë të zhdukur pasi u përfshinë nga përmbytjet ose u varrosën nga rrëshqitjet e dheut, ndërsa 12 të tjerë u plagosën dhe u dërguan në spitale, tha zëdhënësi i policisë Dan Bahadur Karki për agjencinë e lajmeve Reuters.
Më tej ai shtoi se shërbimet e urgjencës po përpiqen të hapin rrugët dhe të largojnë mbeturinat e sjella nga rrëshqitjet e tokës duke përdorur pajisje të rënda ndërtimi.
Ndërsa një zyrtar lokal Raj Fuyal tha se në Nepalin juglindor, lumi Kosi, i cili shkakton përmbytje vdekjeprurëse në shtetin lindor indian të Biharit pothuajse çdo vit, është ngritur mbi nivelin e rrezikut dhe autoritetet u kanë kërkuar banorëve të “qëndrojnë vigjilentë” pasi ekziston rreziku i “përmbytjeve të mundshme”.
