Ish-presidenti i Malit të Zi, Milo Gjukanoviç ka njoftuar autoritetet se ka marrë informacione se ndaj tij po përgatitet një atentat. “Vijesti” shkruan se ish-presidenti e ka marrë informacionin nga një zyrtar i lartë ushtarak nga Kosova.
Policia malazeze të premten vonë ka thënë se nuk ka të dhëna që tregojnë se po rrezikohet siguria e Gjukanoviçit. Agjencia e Sigurisë Kombëtare nuk ka dhënë koment.
“Ish-presidenti i ka marrë informacionet e lartpërmendura nga disa zyrtarë ndërkombëtarë nga komuniteti i inteligjencës dhe me atë informacion ka njoftuar autoritetet shtetërore”, thuhet në përgjigjen e zyrës së Gjukanoviçit për “Vijesti”.
Zyra nuk ka treguar se kush dhe kur i janë dhënë këto informacione Gjukanoviçit.
Sipas burimeve, zyrtari i lartë ushtarak nga Kosova e ka informuar ish-presidentin malazez se një grup i organizuar kriminal nga një vend fqinj dyshohet se po planifikonte të kryente atentatin, në bashkëpunim me shërbimet e sigurisë së një vendi tjetër fqinj.
“Sipas nenit 18 të Ligjit për Presidentin e Malit të Zi, me përfundimin e detyrës, presidenti ka të drejtë për sigurim të përhershëm personal në përputhje me vlerësimin e sigurisë të përcaktuar nga organi kompetent, në pajtim me ligjin. Agjencia e Sigurisë Kombëtare është përgjegjëse për përgatitjen e raporteve për vlerësimin e kërcënimeve të sigurisë”, ka thënë Policia.