Ambasadori i Bashkimit Evropian në Kosovë, Tomas Szunyog, në përfundim të mandatit të tij, ka komentuar masat ndëshkuese që BE ka vendosur ndaj Kosovës dhe procedurën për heqjen e tyre.
Szunyog ka theksuar se këto masa janë vendosur si përgjigje ndaj ngjarjeve të dhunshme në Zveçan më 29 maj 2023 dhe sulmit ndaj KFOR-it, që ndodhi vitin e kaluar. Ai ka theksuar se vendosja e këtyre masave ishte një reagim ndaj një situate shumë serioze dhe një krizë të rëndë, e cila kërkonte veprime të shpejta nga BE-ja.
Në lidhje me heqjen e masave, Szunyog ka deklaruar se kjo kërkon pajtimin e të 27 shteteve anëtare të BE-së. Ai ka thënë se aktualisht po zhvillohet një diskutim midis këtyre shteteve dhe shpreson që shumë shpejt të arrihet një marrëveshje për heqjen e masave.
“Kjo duhet të miratohet nga 27 shtete anëtare. Po zhvillohet një diskutim midis 27 shteteve anëtare dhe shpresoj se shumë shpejt do të gjeni marrëveshje për këtë”, ka thënë Szunyog në një intervistë për EO.
