Një avion është rrëzuar në shtetin brazilian të São Paulo, duke humbur jetë të gjithë personat në bord. Avioni po fluturonte nga Cascavel në shtetin jugor të Paraná në aeroportin Guarulhos në qytetin e São Paulo kur u rrëzua në Vinhedo, sipas linjës ajrore Voepass.
ATR 72-500 mbante 57 pasagjerë dhe katër anëtarë të ekuipazhit. Autoritetet lokale thonë se avioni ra në një zonë banimi dhe se nuk ka asnjë të mbijetuar.
Presidenti i Brazilit, Luiz Inácio Lula da Silva, shprehu solidaritetin me familjet dhe miqtë e viktimave. Ndërsa guvernatori i shtetit të Sao Paulo, Tarcísio Gomes de Freitas shpalli tre ditë zie.
Autoritetet thanë se regjistruesit e fluturimit ishin marrë. ATR, prodhuesi francezo-italian i avionëve deklaroi se do të bashkëpunonte me hetimin.
Sipas faqes së gjurmimit Flightradar24, avioni u largua nga Cascavel në orën lokale 11:56. Sinjali i fundit i marrë nga avioni ishte rreth një orë e gjysmë më vonë.
Agjencia e aviacionit civil të Brazilit tha se avioni, i cili u ndërtua në vitin 2010, kishte qenë “në gjendje të mirë operimi, me regjistrim të vlefshëm dhe certifikata të vlefshmërisë ajrore”.
Katër anëtarët e ekuipazhit në bord ishin të gjithë të licencuar dhe kishin kualifikime të vlefshme, thuhet në deklaratë.
