Prej gjashtë ditësh vijon të digjet Mali i Thatë ku nga flakët e zjarrit po rrezikohet edhe Parku Kombëtar i Prespës. Në terren për të vëzhguar situatën e zjarrit ndodhet Drejtori i Përgjithshëm i Zjarrfikësve Arben Cara , i shoqëruar edhe nga perfekti i qarkut të Korçës Nertil Jole.
Arben Cara u shpreh se zjarri vijon të jetë ende aktiv dhe po punohet nga ajri dhe toka.
“Dje kemi aktivizuar helikopterin “Coogar” i cili ka punuar për një kohë të gjatë dhe ka bërë të mundur mbylljen e një vatre zjarri me perimetër goxha të gjerë. Ditën e sotme që në orët e para të mëngjesit kemi aktivizuar rreth 80 forca operacionale nga MZSH, tre bashkitë Korçë, Maliq, Pogradec, në ndihmë të bashkisë Pustec pranë zjarrfikësve të Pustecit, forca operacionale nga ushtria, agjencia e zonave të mbrojtura, forca të emergjencave civile të cilat aktualisht janë duke shkuar tek vatra e zjarrit e cila kërkon të paktën një kohë minimumi prej tre orësh në këmbë”, tha Cara.
Ai u shpreh se do të vlerësohet situata dhe nëse do të vazhdojë do të kërkohet një ndërhyrje e specializuar nga ajri.