Sali Berisha ka akuzuar Edi Ramën për përdorimin e propagandës mashtruese për të siguruar një mandat të katërt në qeveri.
Në një tubim qytetar, Berisha e përshkroi këtë si një përpjekje të një grupi lakejsh për të rishkruar historinë dhe për të mashtruar shqiptarët.
Ai theksoi se ky është një plan për të grabitur mandatin e ardhshëm dhe apeloi që shtatori të jetë momenti kur qytetarët të ngrihen për të mbrojtur Shqipërinë nga kjo manipulim.
“Miqtë e mi, rastet e propagandës së mashtrimit janë të pafundme, nuk kanë të ndalur. Nuk ka asgjë më të shpifur, më të shpërfytyruar se sa propaganda e një grushti lakejsh që përsisin në studio mashtrime të neveritshme ndaj shqiptarëve. Që përpiqen me çdo kusht të rishkruajnë edhe njëherë historinë e etërve të Edi Ramës.
E gjitha kjo në funksion të mandatit të ardhshëm.
Edi Rama po bën gjithçka të firmosë një mandat të katërt të grabitur, të plaçkitur qytetarëve shqiptarë. Por demokrate dhe demokratë shtatori është prova jonë më e madhe në tërë ekzistencën tonë.
Kush guxon, kush dëshiron, kush vendos, të ngrihet në betejë për shpëtimin e Shqipërisë është hero i vërtetë i së sotmes dhe të ardhmes së Shqipërisë. Është shpëtimtar i vërtetë i së sotmes dhe të ardhmes të Shqipërisë“, tha Berisha.
