Në qarkun e Korçës, vitin e ri shkollor e ka shoqëruar një rënie të ndjeshme të numrit të nxënësve dhe sfida në infrastrukturë.
Këtë vit, janë regjistruar 21,080 nxënës, por numri i nxënësve të klasave të para ka pësuar një rënie prej 394 individësh krahasuar me vitin e kaluar. Po ashtu, në klasën e 10-të janë regjistruar më shumë se 500 nxënës më pak.
Si pasojë e kësaj rënie, janë mbyllur 13 klasa dhe 8 shkolla në Maliq, Ersekë dhe Devoll nuk kanë hapur dyert këtë vit. Në Pogradec, shkollat e zonës së Mokrës janë integruar me ato në qendër.
Edhe pse reduktimi i numrit të nxënësve nuk ka ndikuar në numrin e stafit arsimor, migrimi i popullsisë dhe ulja e lindshmërisë janë identifikuar si faktorët kryesorë që kanë kontribuar në këtë rënie.
