Në Tiranë kanë filluar sot punimet e Samitit të grave afgane, një ngjarje historike që mbledh për herë të parë një numër të madh të grave dhe vajzave nga Afganistani në tre vitet e fundit.
Samiti, i organizuar nën kujdesin e Ministrisë së Jashtme të Shqipërisë, ka si qëllim të avancojë të drejtat e grave dhe vajzave afgane në një kohë kur regjimi taleban po përkeqëson situatën e tyre.
Në fjalën e tij, Ministri i Jashtëm Igli Hasani theksoi se regjimi taleban ka përkeqësuar ndjeshëm kushtet për gratë në Afganistan.
“Eventi i parë që mbledh kaq shumë gra afgane. Talebanët përkeqësuan situatën në Afganistan. Vajzave dhe grave afgane u ndalohet arsimimi. Jemi pjesë e përpjekjeve për paqe në Afganistan. Shumë gra dhe vajza të reja afgane tashmë po integrohen më së miri në shoqërinë tonë. Duhet t’u ofrojmë ekspertizën dhe solidaritetin që u nevojitet“, u shpreh Hasani.
