Mbledhja e Komisionit Parlamentar për Çështjet Europiane është shoqëruar me debate të ashpra, pas shqetësimeve të opozitës lidhur me procesin e integrimit të Shqipërisë në BE.
Kreu i Grupit Parlamentar socialist, Niko Peleshi, kritikoi opozitën për mbajtjen peng të mikrofonit dhe kërkoi që të respektohen procedurat.
“Nuk mund të ketë mbajtje peng të mikrofonit. Procedura që ju zgjodhët të hapnit mbledhjen e Komisionit është totalisht e nëpërkëmbur. Më vjen keq ta them por kjo nuk është qytetare”, tha Peleshi.
Në përgjigje, kryetarja e komisionit, Jorida Tabaku, theksoi se opozita mbështet procesin e integrimit, por e kundërshtoi cilësimin e debatit si proces fasadë. Ajo nënvizoi se opozita nuk do të bllokojë proceset, duke u referuar historisë së mëparshme të PS-së si opozitë.
