Raketat balistike iraniane goditën pjesë të bazës ajrore të Izraelit, e cila ka brenda avionë luftarakë të avancuar F-35, në pjesën qendrore-lindore të vendit, siç konfirmohet nga imazhet satelitore të transmetuara nga mediat izraelite.
Megjithëse nuk ka asnjë shenjë të dëmtimit të madh, siç qarkulluan më herët në mediat sociale, imazhet e kapura nga Planet Labs PBC dhe të publikuara nga Associated Press tregojnë dëme në dy hangarë avionësh në bazën ajrore Nevatim në rajonin e Negevit.
Në mënyrë të veçantë, një prej hangarëve duket se është shkatërruar plotësisht, ndërsa ai ngjitur është pjesërisht i dëmtuar. Imazhet satelitore tregojnë gjithashtu të paktën dy kratere të krijuara nga sulmet me raketa natën e 1 tetorit. Videot e verifikuara të sulmit tregojnë një breshëri raketash që godasin zonën brenda dhe përreth bazës ajrore, sipas Haaretz.
Pavarësisht dëmeve në hangarët, izraelitët raportojnë se nuk janë regjistruar dëme në avionët luftarakë në bazë. Megjithatë, mbetet e paqartë nëse ndonjë avion brenda hangarëve është prekur nga sulmi.
