Fundjava në bazë. Partia Socialiste me sytë nga zgjedhjet, kurse opozita nga protesta e së hënës. Drejtuesit politikë të Partia Socialiste në Tiranë dhe qarqe zhvilluan takime në përgatitje për zgjedhjet e përgjithshme parlamentare, që mbahen vitin e ardhshëm.
Kryeministri Edi Rama publikoi këtë të shtunë një album me fotot e të gjithë drejtuesve në qarqe, gjatë takimeve të mbajtura me strukturat, ndërsa shkroi se komunikimi po bëhet me njerëz brenda dhe jashtë partisë.
“Angazhimi kapilar në çdo qark të vendit, ku në komunikim me njerëzit brenda e jashtë partisë, ka nisur ndërtimi i rrugës së #PS2030”, shprehet Rama.
Opozita fton qytetarët në protestën e së hënës. Drejtuesi Politik për Qarkun e Shkodrës, Luçiano Boçi ka zhvilluar një takim në Kryesinë e Partisë Demokratike, dega Pukë.
Boçi është shprehur se rezistenca, qëndresa e mosbindja civile janë sot format e aksionit politik për të realizuar qeverinë teknike.
“Demokratët e Pukës gjithmonë kanë treguar angazhim e forcë në protestat tona. Takimi konfimoi gadishmërinë e tyre për të qenë bashkë në 7 Tetor në Tiranë.
Rezistenca, qëndresa e mosbindja civile janë sot format e aksionit politik për të realizuar qeverinë teknike dhe dhënien liri kryetarit të opozitës, Ervinit dhe gjithë qytetarëve. Regjimet shemben me forcën e protestave, nuk bien vetë” shkruan ai.
