Jared Kushner dhe Ivanka Trump, të mbështetur nga lidhjet politike dhe investimet nga vendet arabe, kanë propozuar zhvillimin e resorteve ultraluksoze në ishullin e Sazanit në Shqipëri. Pas një vizite të shkurtër në vitin 2021, gjatë së cilës ata u mahnitën nga bukuritë e vendit, Kushner diskutoi idenë me kryeministrin shqiptar Edi Rama gjatë një takimi në Forumin Ekonomik Botëror në Davos. Rama, i cili u shpreh se ishte impresionuar nga propozimi, ka dhënë mbështetje për këtë projekt, që pritet të kapë shifrën e 1 miliard dollarëve.
Plani i Kushner përfshin ndërtimin e vilave ekskluzive dhe ambienteve luksoze në Sazan, një ishull me histori ushtarake. Këto zhvillime janë të parashikuara në një zonë ekologjikisht të mbrojtur, por një ligj i ri shqiptar tani lejon ndërtimin e hoteleve me pesë yje apo më shumë në këto territore. Megjithatë, projektet kanë nxitur kritika nga opozita dhe aktivistët mjedisorë, të cilët shprehin shqetësime për korrupsionin dhe ndikimet politike në këto marrëveshje.
Rama beson se, nëse projekti realizohet siç pritet, Shqipëria do të transformohet në një destinacion turistik të nivelit të lartë, duke sjellë një rritje të ndjeshme në të ardhurat nga turizmi. Ai e quan Kushnerin një mik dhe ka theksuar se negociatat për këtë zhvillim nuk janë të lidhura me ndikimin e Trump, por përputhen me vizionin e tij për të zhvilluar bregdetin shqiptar. Sipas tij, ky projekt do të përbënte një “xhevahir në kurorën e Mesdheut”.
