Gjykata në Romë pritet të marrë një vendim nesër për 7 emigrantët e paligjshëm që u sollën në Shqipëri nga Italia. Ky vendim do të përcaktojë nëse ndalimi i tyre në territorin shqiptar është i drejtë apo jo.
Pak javë më parë, një gjykatë kishte vendosur të anulonte vendimin për ndalimin e 12 emigrantëve të tjerë, duke mundësuar rikthimin e tyre në Itali. Dy ditë më parë, 8 emigrantë të tjerë mbërritën në Shëngjin, por njëri prej tyre u kthye në Itali për shkak të problemeve shëndetësore.
Ministri i Brendshëm italian, Matteo Piantedosi, ka mbrojtur këtë operacion, duke deklaruar se veprimet janë të përputhshme me ligjin evropian, ndërsa ka shprehur kundërshtimin ndaj vendimeve të gjykatave që kanë anuluar ndalimet. Ai theksoi se Italia nuk është dakord me këto vendime dhe ka kundërshtuar ato në gjykatë.
Ndërkohë, një delegacion parlamentar nga Partia Demokratike dhe Lëvizja 5 Yjet, së bashku me përfaqësues të shoqatave të Azilit dhe Imigracionit, po monitoron kushtet e qendrave të azilit, për të siguruar respektimin e ligjit dhe të drejtave ndërkombëtare.
