Irani ka filluar ndërtimin e një “tuneli mbrojtës” në kryeqytetin Teheran, si përgjigje ndaj sulmeve të fundit nga Izraeli.
Ky tunel, i vendosur pranë qendrës së qytetit, do të lidhë një stacion metroje me spitalin “Imam Khomeini”, duke mundësuar një kalim të drejtpërdrejtë nëntokësor për emergjencat dhe qasjen në shërbime mjekësore.
Shefi i transportit i këshillit bashkiak të Teheranit, në një deklaratë për agjencinë Tasnim, tha se ky është projekti i parë i këtij lloji në Iran, me aplikime mbrojtëse të fokusuar në sigurinë e qytetarëve dhe aksesin e shpejtë në raste krize.
Ndërkohë, tensionet me Izraelin janë përshkallëzuar pas sulmeve izraelite ndaj objektivave ushtarakë iranianë në muajin tetor, pas raketave të lëshuara nga Irani në Izrael.
