Plani i qeverisë italiane për krijimin e qendrave të emigrantëve në Shqipëri duket të jetë një dështim i madh, pas një muaji që qendrat kanë mbetur të zbrazura dhe me një numër të ulët emigrantësh. Sipas The Guardian, më shumë se 50 oficerë policie italianë dhe dhjetëra punonjës socialë janë kthyer në Itali, pasi objekti për strehimin e azilkërkuesve, që supozohej të strehonte deri në 3000 emigrantë në muaj, ka mbetur i pabanuar.
Vetëm 24 azilkërkues janë dërguar në këto qendra që nga hapja e tyre më 11 tetor, ndërsa shumica prej tyre janë transferuar shpejt në Itali për shkak të vendimeve gjyqësore që e konsideruan të paligjshëm ndalimin në Shqipëri përpara riatdhesimit.
Ky projekt, i prezantuar nga presidentja e Komisionit Evropian, Ursula von der Leyen, si një model për menaxhimin e migracionit jashtë BE-së, ka hasur në probleme të mëdha. Qeveria italiane ka shpërndarë më shumë se një miliard euro për këtë plan gjatë pesë viteve të ardhshme, duke shkaktuar reagime të ashpra nga opozita, e cila e ka cilësuar si një “katastrofë financiare”.
Dështimi i kësaj iniciative ka shkaktuar tensione edhe brenda sistemit të drejtësisë italiane, me gjyqtarët që janë kritikuar për bllokimin e ndalimit të emigrantëve në Shqipëri. Pavarësisht dështimit, qeveria italiane ka deklaruar se qendrat do të mbeten të hapura dhe funksionale, duke nënvizuar se largimi i punonjësve është bërë për arsye të nevojave të personelit.
