“Erdha, pashë, më pushuan”. Kështu e hap Liberation faqen e parë, me një foto të Michel Barnier duke u larguar nga Parlamenti.
Pas zhvillimit të djeshëm, Barnier, i cili do t’i dorëzojë dorëheqjen presidentit të Republikës, u bë kryeministri i dytë që u rrëzua me një votë mosbesimi pas Georges Pompidou, kryeministër i Presidentit Charles de Gaulle, në 1962 në Francë.
Pas shpalljes së rezultatit të votimit, Marine Le Pen dhe përfaqësuesja e LFI-së Mathilde Panot kërkuan dorëheqjen e Emmanuel Macron, duke e konsideruar atë si fajtorin kryesor për krizën politike në të cilën është zhytur vendi, sipas mediave.
Megjithatë, Le Pen, e cila është kritikuar rëndë nga qarqet e biznesit dhe partia tradicionale e djathtë, Republikanët, për anashkalimin e së majtës në mocionin e mosbesimit, tha se partia e saj ishte e gatshme të punonte me kryeministrin e ardhshëm dhe të kontribuonte në formimi i “një buxheti të pranueshëm për të gjithë”. Presidenti francez pritet të emërojë kryeministrin e ri, ndërsa thirrjet për dorëheqjen e tij rriten –
Shqetësimi për ekonominë
Kulmi i dramës politike e gjeti Macron në Arabinë Saudite, ku deri dje po zhvillonte një vizitë zyrtare treditore. Para se të fillonte seanca e djeshme e Asamblesë Kombëtare, presidenti francez u përpoq të zvogëlonte shqetësimet për ndikimin e mundshëm të paqëndrueshmërisë së qeverisë në tregun francez të parasë dhe kostot e huamarrjes së vendit . “Nuk duhet të alarmojmë botën me histori të tilla. Ne kemi një ekonomi të fortë”, tha Macron para se të kthehej në Paris. Ai gjithashtu hodhi poshtë çdo bisedë për një dorëheqje të mundshme, duke thënë: “Jam këtu sepse jam zgjedhur dy herë me votën e popullit francez”.
Përsëri në kërkim të një kryeministri
Ndihmësit e presidentit francez spekuluan se ai do të përpiqet të emërojë një kryeministër të ri sa më shpejt që të jetë e mundur për të dhënë një imazh të stabilizimit politik, idealisht edhe para së shtunës, kur ai mirëpret Donald Trump dhe figura të tjera politike ndërkombëtare në hapjen e Notre Dame të rinovuar.
Por duke qenë se partia e tij është në pakicë në Asamblenë Kombëtare, zgjedhja e një kryeministri që nuk do të ketë së shpejti fatin e Barnier-it duket si një fjalëkryq politik jashtëzakonisht i vështirë.
Për të pasur sukses, personi që ai zgjedh do të duhet të sigurojë mbështetje si nga republikanët, ashtu edhe nga disa seksione të moderuara të së majtës. Emrat që po qarkullojnë përfshijnë ministrin e Mbrojtjes Sébastien Lecorny të partisë presidenciale të Rilindjes, Francois Bairroux nga qendrat MoDem, Brino Retegio nga republikanët dhe Bernard Cazeneuve nga socialistët.
Presidenti francez pritet të hapë letrat e tij mbrëmjen e sotme me një fjalim televiziv për qytetarët, siç u bë e ditur dje menjëherë pas rënies së qeverisë.
