Kuvendi i Shqipërisë prej orës 10:00 ka nisur seancën plenare. Kryetari i grupit të PD-së, Gazment Bardhi kërkoi nga kryetarja e Kuvendit interpelancën me kryeministrin Edi Rama për pagesën 110 mln euro për biznesmenin italian Becchetti.
“Pse nuk keni futur në rend dite kërkesën tonë për interpelancë me Ramën? Të vijë Rama dhe të bëjmë interpelancë për pagesën 110 mln euro për Becchetti” tha Bardhi.
Elisa Spiropali tha se interpelanca shtyhet për shkak të axhendës së kryeministrit. “Për shkak të axhendës së kryeministrit nuk mund të zhvillohet sot por do të zhvillohet në seancën e radhës ose më të parën që do të jetë i pranishëm kryeministri” tha ajo.
