Prokuroria e Posaçme SPAK feston sot 5 vjetorin në një aktivitet të organizuar ku të pranishëm janë dhe Zëvendësndihmës sekretari amerikan për Ballkanin Perëndimor, Alexandër Kasanof dhe ambasadori i BE-së. Mesazhi i zyrtarit amerikan ishte i qartë; lejoni zgjatjen e mandatit të prokurorëve të SPAK-ut.
Aleksandër Kasanof, zv/Ndihmës Sekretari Amerikan i Shtetit deklaroi “Urime z. Dumani që u shpall kampion për luftën ndaj korrupsionit. Çmimi për Dumanin është për SPAK dhe për të gjithë qytetarët e Shqipërisë. Sekretari Amerikan i Shtetit përgëzon punën e bërë kundër korrupsionit dhe krimit në Shqipëri. U desh guxim i madh për të nisur këtë udhëtim. U desh guxim për të ngritur një institucion të pavarur drejtësie. Qytetarët duhet ta dinë se ankesat e tyre do të merren në konsideratë. SPAK do të vendosë Shqipërinë në anën e duhur të historisë. Qytetarët kërkuan ndryshimin dhe qeveria i dëgjoi. SPAK ka rritur besimin tek qytetarët për drejtësi në vend.
Për t’u siguruar që SPAK do të vazhdojë pa ndërprerje luftën kundër korrupsionit dhe krimit të organizuar në të ardhmen, ne besojmë se prokurorët e SPAK-ut duhet të lejohen të aplikojnë për të shërbyer sërish pas përfundimit të mandatit të tyre aktual. Dështimi për të realizuar këtë, rrezikon të ndërpresë përpjekjen më të suksesshme kundër krimit të organizuar dhe korrupsionit në historinë shqiptare dhe rrezikon humbjen e profesionistëve më me përvojë e të njohurive të tyre institucionale” tha ai.
Prokuroria e Posaçme kundër Korrupsionit dhe Krimit të Organizuar, si organi përgjegjës për hetimin dhe ndjekjen penale në fushën e korrupsionit dhe krimit të organizuar përfaqëson akuzën përpara gjykatave të posaçme. Prokurorët e Prokurorisë së Posaçme zgjidhen për një mandat 9-vjeçar pa të drejtë riemërimi. Por në Prill te ketij viti Dumani kerkoi zgjatjen e mandatit dhe SHBA sot e mbeshteti.
