Enkelejd Alibeaj ka komentuar zhvillimet e fundit në lidhje me drejtësinë e re, duke theksuar se ajo tashmë nuk është më një lojë siç kishte filluar në vitin 2016. Sipas tij, ata që votuan për reformën në drejtësi menduan se do të kishte një përmirësim, por jo për pjesën elitare të politikës.
Alibeaj shprehu mendimin se SPAK po vepron duke goditur sistemin politik të korruptuar dhe jo individët. “Drejtësia e re nuk është më lojë. Ajo nisi si lojë në 2016, kur të gjithë mendonin se do të kishte drejtësi, por jo për elitat politike. Fakti është që SPAK po godet sistemin dhe jo individë të veçantë,” tha ai në emisionin “Log” në News24.
“Lexova sot 8 justifikime që kishin nxjerrë, që nga fakti që është anonim denoncimi, kanë bërë hetime por këta nuk dinin gjë. Nuk qëndron asnjëra. Sot legjislacioni shqiptar i importuar nga Perëndimi përcakton detyrimin që SPAK BKH edhe policia duhet që sa herë vihet në dijeni ta fillojë me iniciative. SPAK ka detyrimin që cdo kallëzim do të duhet ti verifikojë. Nëse rezulton se ka bazë, fillon procedimin. Pra bie e para”.
