Policia e Sarandës ka arretuar një 61-vjeçar nga Finiqi pasi u kap duke shitur celularë dhe aksesorë të dyshuar si mallra kontrabandë. 61-vjeçari me iniciale B.Ç., tregtonte mallra pa dokumentacion të rregullt në lagjen nr.2 të Sarandës.
Në cilësinë e provës materiale u sekuestruan 34 aparate celularë, mbi 350 aksesorë celularësh, ora dore të markave të ndryshme, të gjitha me një vlerë të përafërt prej 20,000 euro.
Ndërsa 61-vjeçari akuzohet për veprat penale “Tregtimi i mallrave kontrabandë”, “Ruajtja e mallrave kontrabandë”, “Punësimi i paligjshëm”, “Fshehja e të ardhurave” dhe “Ushtrimi i aktivitetit tregtar të paregjistruar në organet tatimore”. Ndërkohë materialet i kaluan prokurorisë për veprime të mëtejshme.
