Agjencia e Mbikëqyrjes Policore ka arrestuar një punonjës policie si dhe ka pezulluar nga detyra dy punonjës të tjerë. Në pranga ka rënë inspektori S. K., punonjës i policisë kufitare në Gjirokastër, i dyshuar për kryerjen e veprave penale “Shkelja e rregullave të qarkullimit rrugor” dhe “Drejtimi i automjeteve në mënyrë të parregullt”.
Gjithashtu Agjencia e Mbikëqyrjes Policore ka pezulluar nga detyra 2 punonjës policie, të dyshuar për kryerjen e veprës penale “Shpërdorimi i detyrës”, konkretisht, Inspektor L. K., me detyrë Ndihmës Kontrollor në P.K.K. Kakavijë dhe Inspektor O. B., me detyrë Ndihmës Kontrollor në P.K.K. Kakavijë.
Punonjësi i policisë gjatë drejtimit të mjetit tip “Seat” është përplasur me një automjet tjetër ku si pasojë kanë mbetur të dëmtuar pasagjerët e mjetit Opel, A. R. dhe shtetasi i mitur G. R., të cilët pas marrjes së ndihmës së parë mjekësore janë larguar për në banesë dhe ndodhen jashtë rrezikut. Nga verifikimi me testin matës të alkoolit rezultoi pozitiv.
Kurse policët lejuan kalimin në territorin e Republikës së Shqipërisë të automjetit të markës “Toyota Avensis” pa dokumentacionin përkatës, duke mos ndjekur procedurat ligjore me qëllim trafikimin.
