Ditën e sotme në Kosovë po mbahen zgjedhjet e rregullta parlamentare. Qytetarët po ushtrojnë të drejtën e tyre kushtetuese për të votuar.
Sipas Komisionit Qendor të Zgjedhjeve deri në orën 11:30 në Komunën e Leposaviqit ende nuk ka votuar asnjë votues. Ndërsa në komunat e tjera po vijon votimi normalisht.
Sipas të dhënave janë gjithsej 13,876 qytetarë të regjistruar si votues në atë komunë, por se në kutitë e votimit nuk është hedhur asnjë votë deri në orën 11:00.
Në Leposaviq janë hapur 18 qendra të votimit me gjithsej 26 vendvotime.
Pjesëmarrja në zgjedhje deri në orën 11:00, sipas KQZ-së, është 8.58 për qind.
Në garë janë 28 subjekte politike dhe një kandidat i pavarur, si dhe katër kandidatë për kryeministër: Albin Kurti nga LVV-ja, Bedri Hamza nga PDK-ja, Lumir Abdixhiku nga LDK-ja dhe Ramush Haradinaj nga koalicioni AAK-Nisma dhe partnerët e tjerë.
