Kryetari i grupit të PD-së, Gazment Bardhi akuzoi ministrin e Brendshëm, Ervin Hoxha se gënjeu dhe keqinformoi publikisht gjatë seancës parlamentare lidhur me sjelljen e policisë në protestën që zhvilluan mbështetësit e Erion Veliajt para GJKKO-së.
Ai shkruan më tej se Erion Veliaj nuk është mbi ligjin dhe se Policia e Shtetit është keqpërdorur nga kryeministri Edi Rama për t’i ardhur në ndihmë një personi që hetohet për korrupsion dhe pastrim parash. Për këtë arsye, ai thotë se ministri Ervin Hoxha dhe drejtori i policisë, Ilir Proda duhet të shkarkohen nga detyra dhe të ndiqen penalisht.
“Ministri i Brendshëm gënjeu dje publikisht dhe keqinformoi Kuvendin e Shqipërisë lidhur me mosveprimin e Policisë së Shtetit ndaj tentativës mafioze të drejtorëve batakçi të Bashkisë së Tiranës për të intimiduar fizikisht në krye të detyrës gjyqtarët dhe prokurorët e posaçëm. Ky mashtrim institucional dhe publik i Ministrit të Brendshëm provon edhe autorësinë e urdhrit politik për të penguar drejtësinë që të mbajë përgjegjës para ligjit cilido, pavarësisht statusit të tij.
Edi Rama mund të zgjedhë të jetë avokat i Erion Veliajt, por këtë duhet ta bëjë privatisht, jo duke keqpërdorur institucionet e shtetit. Mosveprimi i Policisë së Shtetit, që sipas GJKKO dhe SPAK, ka vënë në rrezik jetën dhe shëndetin e gjyqtarëve, prokurorëve dhe stafit administrativ, në krye të detyrës, nuk mund të kalojë në heshtje. Ministri i Brendshëm dhe Drejtori i Përgjithshëm i Policisë së Shtetit duhet të shkarkohen menjëherë nga detyra dhe të ndiqen penalisht. Kjo është edhe një grusht shteti i pushtetit ekzekutiv ndaj pushtetit gjyqësor”.
