Sipas një artikulli të The Telegraph, trafikantët shqiptarë të njerëzve që operonin me kamion nga Europa në Angli po kërkojnë të shmangin ekstradimin në Belgjikë, duke pretenduar se kushtet në burgjet belge janë të papranueshme.
Ata argumentojnë se qelitë janë të vogla dhe të mbipopulluara, duke shkelur të drejtat e njeriut sipas Konventës Evropiane. Një prej këtyre trafikantëve, Sabah Zeka, ka luftuar ekstradimin që nga arrestimi i tij në maj 2022, duke argumentuar se mbipopullimi i burgjeve do të shkaktonte trajtim çnjerëzor dhe degradues.
Përveç Zekës, edhe Adriatik Hysenlika, një tjetër trafikant shqiptar, po sfidon ekstradimin në Belgjikë, me pretendimin se kushte të ngjashme do të shkelnin të drejtat e tij.
Këta trafikantë janë përfshirë në grupe që kontrabandonin emigrantë të paligjshëm, dhe tani po përballen me dënime të rënda. Kritikët e këtyre kërkesave i quajnë abuzive dhe të pabaza, duke theksuar se këto pretendime kanë vonuar proceset e ekstradimit për vite.
