Analiza e BBC
Marrëdhënia mes Donald Trump dhe Volodymyr Zelensky ishte mjaft e tensionuar para përplasjes në Zyrën Ovale.
Presidenti Trump e kishte quajtur homologun ukrainas tashmë një diktator dhe deklaroi se Ukraina filloi luftën.
Tani aleanca SHBA-Ukrainë e “ushqyer” nga Joe Biden është copëtuar. Përplasja publike sinjalizon gjithashtu një krizë të madhe që po afrohet midis anëtarëve evropianë të NATO-s dhe SHBA-së.
Do të ketë shumë më shumë dyshime dhe pyetje në lidhje me angazhimin e SHBA për sigurinë evropiane jashtë Ukrainës. Më e rëndësishmja është nëse Presidenti Trump do ta mbajë premtimin që paraardhësi i tij Harry Truman bëri në vitin 1949 për të trajtuar një sulm ndaj një aleati të NATO-s si një sulm ndaj Amerikës.
Këto shqetësime bazohen në atë që duket të jetë vendosmëria e Trump për të rivendosur një marrëdhënie të fortë me presidentin rus Vladimir Putin.
Ai ka ushtruar presion të madh mbi Ukrainën, ndërkohë që i ka ofruar Putinit lëshime të mëdha, që do të duhej të bëheshin nga ukrainasit. Ndërkohë evropianët po shqetësohen edhe për sigurinë e tyren.
Refuzimi i Presidentit Zelensky për të bërë lëshime ka zemëruar Trump. Nuk është vetëm marrëveshja e mineraleve që ai refuzoi të nënshkruajë. Ukrainasit besojnë se janë në një luftë për mbijetesë kombëtare dhe se Putini do të thyente çdo premtim për t’i dhënë fund luftës nëse nuk frenohet.
Kjo është arsyeja pse Zelensky kërkoi vazhdimisht garanci amerikane të sigurisë. Takimi mes tyre u “ndez” pas një ndërhyrjeje të zëvendëspresidentit JD Vance.
Tani ka dyshime se mosmarrëveshja ishte, sipas fjalëve të një vëzhguesi diplomatik, e planifikuar: ose për të detyruar Zelensky të pranonte kërkesën e Amerikës, ose për të nxitur një krizë që do t’i lejonte ata ta fajësonin atë për çfarëdo që të ndodhte më pas.
Nëse Trump pason prishjen e bisedimeve me një ngrirje të ndihmës ushtarake, Ukraina do të luftojë. Pyetjet janë sa efektive dhe për sa kohë. Ndërkohë presioni do të dyfishohet mbi aleatët e saj evropianë.
