Një tragjedi ka ndodhur në qytetin Koçan të Maqedonisë së Veriut, ku një shpërthim i zjarrit në një klub nate ka marrë jetën e të paktën 50 personave, dhe ka plagosur dhjetëra të tjerë. Zjarri ka shpërthyer pas përdorimit të mjeteve piroteknike gjatë një performance nga grupi muzikor maqedonas, DNA. Klubi ka qenë i mbushur plot me njerëz në momentin e shpërthimit të flakëve.
Disa nga të plagosurit janë dërguar për trajtim në spitalet e qyteteve Shtip dhe Shkup, ndërsa shumë të tjerë janë ende të humbur. Dëshmitarët dhe të afërmit e të prekurve janë mbledhur para klubit në kërkim të informacionit për familjarët e tyre, disa prej të cilëve nuk po përgjigjen në telefon.
Pas shpërthimit të zjarrit, zjarrfikësit, ambulancat dhe forcat policore kanë arritur menjëherë në vendngjarje. Autoritetet maqedonase kanë nisur hetimet për të kuptuar shkakun e shpërthimit të zjarrit, ndërsa janë arrestuar disa individë që kanë lidhje me organizimin e ngjarjes.
Drejtori i Qendrës për Menaxhimin e Krizave dhe autoritetet përkatëse janë në terren dhe kanë premtuar se do të ofrojnë më shumë informacion më vonë gjatë ditës.
