Ditën e nesërme pritet që të bëhet varrimi i 59 viktimave që humbën jetën nga shpërthimi i zjarrit në diskotekën në Koçan.
Ministri i Shëndetësisë Arben Taravari njoftoi se transportimi i trupave të pajetë do të bëhet në oordinim me familjet, nëse duan t’i transportojnë privatisht apo me organizim të shtetit.
“Unë kam informatë se në mjekësinë ligjore kanë mbaruar të gjitha autopsitë dhe besoj se në mënyrë si kanë kërkuar familjet e atyre që kanë të vdekur nga ky rast, privat apo do të ketë organizim prej shtetit në bazë të koordinimit me ato, ashtu do të veprojmë”, tha ai.
Kisha Ortodokse Maqedonase për Alsat njoftuan se varrimi pritet të bëhet në mesditë.
Në mesditë në Shkup, përkatësisht në Lisiçe dhe Butel pritet të bëhet varrimi edhe i një pjese të anëtarëve të grupit muzikor DNK, të cilët ishin në mesin e 59 viktimave.
Ceremoni varrimi nesër do të bëhen në Koçan, Shtip, Vinicë, Zërnoc, Makedonska Kamenicë, Çeshinovë- Obleshevë, Probishtip dhe në Shkup. Varrimi pritet të bëhet me nderimet më të larta shtetërore.
