Presidenti i Serbisë, Aleksandër Vuçiç, ka zhvilluar një takim me Peter Sorensen, dërguarin special të BE-së për dialogun Kosovë-Serbi, në Beograd.
Gjatë takimit, Vuçiç theksoi se themelimi i Asociacionit të Komunave me Shumicë Serbe është parakusht për normalizimin e marrëdhënieve me Kosovën, duke kërkuar angazhimin e BE-së për të mbajtur një rol të paanshëm në proces.
“Unë theksova pengesat e vazhdueshme që bën Prishtina në procesin e dialogut dhe ritheksova se formimi i Asociacionit të Komunave me Shumicë Serbe, pas 12 viteve të refuzimit të Prishtinës për ta përmbushur obligimin, është parakusht për fillimin e normalizimit esencial të marrëdhënieve”, shkroi Vuçiç në rrjetet sociale.
Ai shtoi se Serbia është e gatshme për një dialog konstruktiv që mund të sjellë paqe dhe stabilitet në Ballkanin Perëndimor.
“Theksova pritjen se BE-ja do të rrisë angazhimin e saj dhe do të mbajë një rol të paanshëm në këtë proces. Përsërita qëndrimin e Serbisë se vetëm dialogu konstruktiv dhe zgjidhjet kompromisi mund të kontribuojnë për paqen dhe stabilitetin afatgjatë në Ballkanin Perëndimor”, shtoi ai.
