Prokuroria Themelore në Ferizaj njoftoi sot se nga provat zbulohet se polici Muhamed Lika u vra të martën në mbrëmje në Kaçanik nga dy persona. Deri tani nuk ka të arrestuar e as të identifikuar. Kryeprokurori Burim Çerkini tha se autorët shihen në pamjet e siguruara nga kamerat e sigurisë. Autorët s’kanë përdorur maska, por kanë pasur kapele, sipas Prokurorisë.
“Megjithatë, ka qenë natë dhe ka qenë zor të identifikohen”, ka thënë ai. Prokuroria ka thënë se po punohet për të gjetur motivet e vrasjes së rëndë. Megjithatë, kryeprokurori ka hedhur poshtë pretendimet se vrasja ka të bëjë me grabitje të armatosur. “Qëllimi i tyre ka qenë ekzekutimi i policit”, ka thënë ai.
