“Daily Mail” zbardh skemën si shqiptarët arrijnë të dërgojnë paratë e fituara në rrugë kriminale drejt atdheut. Sipas artikullit, bandat shqiptare rekrutojnë turistë të rremë për të dërguar para të pista drejt Shqipërisë, të cilat i investojnë për të bërë një jetë luksoze.
“Në fund të vitit të kaluar, kishte pothuajse 1,100 shqiptarë në burg, përfshirë vrasës, përdhunues dhe udhëheqës të mafies ballkanike. Vetëm tre ishin gra.
Përveç kontrollit të tregtisë së drogës, bandat shqiptare që terrorizojnë Mbretërinë e Bashkuar janë gjithashtu të dënuar për vrasje, krime seksuale, pastrim parash dhe trafikim njerëzish”, sipas Daily Mail.
“Bandat shqiptare kanë arritur të dominojnë tregun e drogës në Britani, duke negociuar drejtpërdrejt me kartelët kolumbianë dhe duke nënçmuar rivalët për të mbushur rrugët e Britanisë me kokainë të lirë” vijon më tej shkrimi.
Një burim nga komuniteti shqiptar në Britani, i tha gazetës se numri i madh i furgonëve dhe kamionëve që kalojnë çdo ditë në Dover bën që kriminelët të transportojnë para të fshehura mes mallrave.
