Policia ka gjetur dhe ka sekuestruar 2 armë zjarrri kallashnikov dhe municion luftarak. Gjatë kontrollit në fshatin Bodrishtë, një person i paidentifikuar kishte fshehur armë zjarri dhe municion luftarak.
Sipas informacioneve një person, që nuk është banor i fshatit Bodrishtë i kishte fshehur armët e zjarrit në një banesë të pabanuar dhe për shkak të presionit policor, armët e zjarrit dhe municionin luftarak i kishte hedhur në terren.
Gjatë kontrollit të territorit policia në bashkëpunim me punonjësit e pastrim-gjelbërimit, gjetën në një kosh mbeturinash, 2 armë zjarri kallashnikov dhe municion luftarak.
Armët e zjarrit do të dërgohen në Institutin e Policisë Shkencore, për ekspertim, për të parë nëse janë përdorur ose jo në ngjarje kriminale të mëparshme.
Gjithashtu, një grup i posaçëm hetimor, në drejtimin e Prokurorisë, po punon për identifikimin dhe kapjen e shtetasit që posedonte armët e zjarrit dhe municionin luftarak.
