Të mërkurën në mbrëmje dy punonjës të ambasadës izraelite u vranë nga një person i armatosur në Uashington, DC. Çifti i ri që do të fejoheshin po largoheshin nga një aktivitet jashtë Muzeut Hebraik.
Në lidhje me këtë ka reaguar edhe Shtëpia e Bardhë ku tha se “urrejtja nuk ka vend në Shtetet e Bashkuara nën Presidentin Donald Trump”.
Ata theksuan se personi i dyshuar për vrasjen e dy punonjësve të ambasadës izraelite në Uashington, do të ndiqet penalisht “në masën më të plotë të ligjit”.
Sekretarja e shtypit Karoline Leavitt tha në një konferencë për shtyp se Trump është “i prekur dhe i indinjuar”.
“E keqja e antisemitizmit duhet të zhduket nga shoqëria jonë”, shtoi ajo.
Leavitt i quajti dy diplomatët e vrarë, Yaron Lischinsky dhe Sarah Milgrim, një “çift të ri të bukur” dhe foli për dashurinë e tyre për njëri-tjetrin.
