NATO dhe Perëndimi duhet të përgatiten për më të keqen, sepse Rusia është përsëri një rrezik.
Nevoja për t’u përballur me një sulm duhet të merret në konsideratë.
Alarmi u ngrit dje gjatë samitit të ministrave të mbrojtjes të Organizatës Atlantike.
Së pari, ambasadori amerikan, Matthew Whitaker, pastaj vetë sekretari i përgjithshëm i NATO-s, Mark Rutte, paralajmëroi se aleatët, veçanërisht evropianët, kanë detyrën ta marrin parasysh këtë gjë.
“Urgjenca e momentit është e pamohueshme”, tha Whitaker.
“Ndërsa konflikti midis Rusisë dhe Ukrainës vazhdon, Moska tashmë po përgatit lëvizjen e saj të radhës. Kremlini po rindërton ushtrinë e tij. Aleatët e NATO-s duhet ta kapërcejnë Rusinë. Nuk kemi zgjidhje tjetër. Më lejoni të jem i qartë: ka ardhur koha për të vepruar. Ne kemi nevojë për një aleancë të ndërtuar për kërcënimet e vitit 2025 dhe më tej, jo për fushat e betejës së djeshme”.
Toni i Rutte-s nuk ishte i ndryshëm.
“Ne jemi gjithmonë të përgatitur për çdo eventualitet. Dhe Vladimir Putin duhet ta dijë se nëse përpiqet të na sulmojë – ai po i referohet kryesisht vendeve baltike – reagimi ynë do të jetë shkatërrues. Ne do të jemi shkatërrues dhe shumë efektivë edhe pas tre, pesë apo shtatë vitesh, dhe kjo është arsyeja pse duhet të shpenzojmë më shumë”.
Pra, “çdo centimetër i territorit të NATO-s” do të mbrohet dhe “kushdo, qoftë Putini apo dikush tjetër, që mendon se nuk është kështu, gabon dhe do të përballet me pasojat”.
Ekzistojnë dy pika fillestare. Deri tani, edhe Donald Trump e ka kuptuar se presidenti rus në këtë kohë nuk ka ndërmend të arrijë paqe apo armëpushim në Ukrainë.
Kjo vatër lufte do të jetë aktive të paktën për disa nga muajt e ardhshëm.
Raportet e agjencive të ndryshme të inteligjencës evropiane konfirmojnë mbi të gjitha se planet e Moskës përfshijnë vazhdimisht dëshirën për të rifituar kontrollin e një pjese të territoreve që dikur i përkisnin “Rusisë së Madhe”, pra vendeve si Lituania, Estonia, Letonia dhe Moldavia.
Një rrezik që NATO nuk mund ta injorojë. Aq sa SHBA-të po i këshillojnë partnerët e tyre në “Kontinentin e Vjetër” të pesëfishojnë sistemet e tyre të mbrojtjes ajrore dhe tokësore.
Pika e dytë është pasojë e së parës: aleatët duhet të shpenzojnë më shumë për mbrojtjen.
Uashingtoni e ka bërë të ditur, që kur administrata e re mori detyrën, se nuk ka më ndërmend të mbajë mbi supe i vetëm barrën e sigurisë evropiane.
“Për momentin”, theksoi Rutte pa i qetësuar dëgjuesit, “nuk ka plane për tërheqjen e trupave nga Shtetet e Bashkuara nga Evropa”, por “ata presin që aleatët evropianë dhe kanadezë të shpenzojnë shumë më tepër”.
Shtetet e Bashkuara, gjithashtu në prag të samitit të NATO-s në fund të muajit në Holandë, këmbëngulin që shpenzimet për mbrojtjen të arrijnë 5% të PBB-së. Në fakt, ata e konsiderojnë atë “jo një sugjerim”, por “një angazhim konkret”.
Megjithatë, kjo është një shifër monstruoze për shumë vende në Bashkim. Mjafton të thuhet se Italia aktualisht arrin 1.3%, ose një të tretën e asaj që kërkohet.
Edhe Ministri gjerman i Mbrojtjes, Boris Pistorius, e ka frenuar këtë synim.
“Askush, për momentin, nuk e mbështet vërtet qëllimin prej 5%, sepse është jorealist. Ajo për të cilën po flasim është një rritje e përqindjes në vitet që vijnë”./ La Repubblica
